тактикалық-техникалық көрсеткіштер

(Тактико-технические данные)

қару-жарақ түрлері мен соғыс техникасының жауынгерлік және техникалық мүмкіндіктерін сипаттайтын көрсеткіштер жиынтығы. Қарудың Т.т.к-іне сүйене отырып, командирлер әскерлерге нақтылы жауынгерлік міндеттер жүктейді, соғыс операциясын жүргізу үшін қажетті материалдық-техникалық жабдықтар көлемін анықтайды. Әрбір қару-жарақтың өз Т-т.к-і болады. Мыс., зеңбірек пен минаатардың негізгі Т.-т.к-і олардың калибрі, снарядының бастапқы жылдамдығы, атылу шапшаңдығы, жорық пен ұрыс жағдайына келтіру уақыты, алыс нысанаға тигіштігі. Танкілердің Т-т.к-і қозғалтқыштарының күші,қару-жарағы, снарядтары мен патрондарының жауынгерлік комплексті, жалпы салмағы, жорық пен ұрыстағы жүріс жылдамдығы, сауыттың қалыңдығы, жанармай қоры, экипаж саны, т.б.; ұшақтардың Т-т.к-і моторының саны мен қуаты, ең жоғары және крейсерлік шапшаңдығы, аспанға тез көтерілгіштігі, ұшу биіктігі, қарулануы, жүгі, экипаж мүшелерінің саны, т.б.; корабльдердің Т-т.к-і қару-жарағы, сыйымдылығы, қозғалтқыштарының қуаты, жылдамдығы, жанармай қоры, экипаж қоры, экипаж саны, т.б.; байланыс құралдарының (телефон, телеграф, радио, т.б.), инженерлік құралдардың да Т-т.к-і бар.